بہرائچ کے فخرپور علاقہ کے تتہرا گاؤں میں ہوئے فرقہ وارانہ فساد پر ملی کونسل کی برہمی

آل انڈیا ملی کونسل نے اترپردیش کے بہرائچ ضلع کے مضافاتی گاؤں میں فرقہ پرستوں کے ذریعہ مسلمانوں پر کیے گئے حملے کی شدید مذمت کرتے ہوئے اپنی سخت برہمی کے ساتھ ریاستی حکومت سے اس واقعہ کی جوڈیشیل انکوائری کا مطالبہ کیاہے۔ یہاں جاری ایک پریس ریلیز میں جنرل سکریٹری ڈاکٹر محمد منظور عالم نے کہا ہے کہ ایک طرف جہاں پورے ملک کی سطح پر تشدد اور نفرت کی آگ بھڑکانے کی منصوبہ بند سازشیں کی جارہی ہیں، اترپردیش میں آئندہ ہونے والی صوبائی انتخابات کو پیش نظر



رکھ کر اور اشتعال انگیزی پھیلا کر فرقہ وارانہ صف بندی کرنے کی مہم جاری ہے،جس پر ریاستی حکومت کو جہاں سخت ایکشن لینے کی ضرورت ہے وہیں امن وامان کی صورت حال کو بہتر بنانے پر خصوصی توجہ دئیے جانے کی ذمہ داری بھی ہے۔
انہوں نے کہا ہے کہ موجودہ صورت حال ایسی ہے کہ کسی نہ کسی شکل میں مسلمانوں کے قتل وخون کی سازش کی جارہی ہے، جبکہ مسلمانوں نے اپنے ماضی سے کہیں زیادہ تحمل اور بردباری کا ثبوت پیش کیا ہے تاکہ لوگوں کو کسی طرح کی زیادہ اشتعال انگیزی کا موقع نہ مل سکے۔